E bakinan di índigo di e potrèt akiriba ta basta leu for di e lanthùis Rif.

Parti patras di e baki aki tin un baki mas. Paden ta seya i ta mustra ros.

         
   

Den siglo 18 tabata produsí indigo na Kòrsou.
Índigo ta un tipo di tensha blou pa fèrf paña.

E hendenan sklabisá mester a kòrta e  matanan di índigo i trese nan na e baki. E baki a tuma hopi awa tambe. Nan a pone e matanan kòrta den e promé baki ku awa. Eiden nan tabata laga e awa bomba, fermentá. Despues di un dia kompletu nan tabata laga e awa kore den e di dos baki. E kachikachi di e matanan nan ta benta afó. E kontenido di e di dos baki mester ta bati kontinuamente pa trese hopi oksígeno den e awa. E ora ei e awa ta bira bèrdè, kaba e ta kambia bira  blou. Ora e awa ta bon blou ta lag’é para ketu pa e kolo blou di índigo ta sak abou. E ta bira manera un papa. Nan ta laga e awa kore den e di tres baki pa mas índigo sak abou. Nan ta pone e índigo den saku i ta seka nan den solo pa despues paketá pa eksportá den forma di blòki chiki.

Ora e Alemannan a desaroyá un proseso sintétiko (na 1897) ku a resulta mas barata di a traha índigo e eksportashon di índigo for di Kòrsou a stòp kompletu.

E proseso di bati índigo ta hopi malu pa salu di hende. E bon bientu na Kòrsou si ta suavisá e efektonan di e gasnan i holó ku ta sali for di e awa di índigo.